Member-only story
點做一個人見人憎嘅老細
1）成日強調自己做嘢有幾辛苦，幾勞苦功高
喂，大佬，邊個做嘢唔辛苦架？你隻馬仔就算唔使OT，香港都冇邊份工係輕鬆架啦，就算physical workload唔大，都多少要睇眉頭眼額，唔攰架大佬？
最怕就係啲老細話自己凌晨五點鐘先訓，七點鐘先起身。
喂，條路自己揀，仆街唔好喊，你成日話自己咁辛苦，咁不如請多啲人等自己舒服啲囉，一係就做少啲嘢，點解講到自己冇得揀咁囉。
係咪你就辛苦，人地就唔辛苦呀？
下屬最憎聽到咩？就係：
「你可能覺得自己好chur啦，其實我，仲chur呀！（下刪500字）」
喂，chur唔chur呢啲好主觀架喎，你憑咩話自己chur過其他人呢？
2）干涉下屬私人時間做啲咩
講真，一個員工只要能夠準時返工，佢放左工做啲咩一律都係佢嘅私人事。除非佢嘅私人事務影響到工作，老細係唔應該干涉嘅。
以前係律師樓半工讀，我都算抵諗，覺得OT下比老細冇咩所謂，但當我啲同事想準時放工個陣，有啲老細竟然會問，你想咁準時放工做咩？係咪約左人？係咪要返學？
喂，其實講真，人地放左工做咩真係唔關你事，話比你只就係人情，唔話俾你知係道理，大家係主僕關係，又唔係朋友關係，點解要同你交代？
曾經遇過一個老細，會話：「啊邊個邊個，喂你今個假期有冇嘢做，冇嘢做唔會唔番黎公司幫手？」
喂，大佬，平時做嘢已經夠辛苦，人地公眾假期都要食埋？係咪我公眾假期冇嘢做（假期嘅定義就係冇嘢做，透一透）就要番黎幫你？
其實我放假有冇嘢做，真係唔關你事，如果你想我番黎幫手，不如你直接問，可唔可以番黎幫我，而唔係問咗人地得唔得閒先，人地得閒都唔代表想幫你架。
3）Send Facebook requests畀下屬
下屬會唔會覺得有Accept你request嘅壓力呢？如果你send咗個request比佢，佢accept咗，係咪要收埋晒啲佢覺得你唔鍾意嘅嘢？就算佢Facebook冇咩唔比得你睇，佢都覺得自己post嘅相同寫嘅嘢比你judge，咁於呢段主僕關係有咩好處？
4）用自己真名睇下屬IG
都係嗰個道理啦，人地post咩人地事，只要人地工作表現okay，你唔好理人地私人時間做咩。就算你睇呀，你都唔好用自己真名睇啦，比下屬 “I am watching you”嘅壓力就唔好啦，你估平時喺公司仲未受夠咩。