點樣克服唔想學習既惰性？

好多同學同我講：「我想學好英文，但總係的唔起心肝學好，點樣克服唔想學習既惰性？」

「我明明知道懶惰會令我學唔好，要學好就要下苦工，但點解硬係擺脫唔到懶惰？」

有人問過Youtuber ming仔：道理好多人都識，但點解好多人都做唔到？

Ming仔答：如果你知道呢個道理，但係做唔到，代表你未明白呢個道理既重要性。

其實係咩意思？

你明明知道惰性令你無法進步，但唔知點解就係懶，就係唔想做，唔想學，因為你未明白惰性帶黎既consequence（後果）。

要克服不願做一件事既惰性，要逼自己學野，要逼自己進步，就係要諗清楚，唔做呢件事會令將來既你失去啲乜嘢。

所以我覺得，學嘢就係過程會好痛苦，但唔做仲痛苦既一件事。

網絡作家 James Clear 講過一句說話：The costs of your good habits are in the present. The costs of your bad habits are in the future. （好習慣和壞習慣都有成本，但好習慣的成本要你現在付出；壞習慣的成本則要你未來付出。）

我好鍾意英文，我相信好多未學好英文既同學一直遇到既困難就係股唔起決心學英文，一直對英文好抗拒。

我攞一樣我自己都好抗拒但係又要做好既野黎舉例，同大家說明一下。

坦白同大家講，我其實一直都唔enjoy剪片，好多粒制要記住點樣禁，好多步驟要跟，好瑣碎，我細個最唔鍾意就係上IT堂，你地諗下，我連photoshop都唔願意學，點會肯學用
premiere pro。

不過我依家自己都學緊點樣剪片，點樣加effect，點樣用hot keys，令剪片過程快啲，少啲等待，開心啲，因為我知道自己個人好冇耐性，好唔鍾意等，所以我寧願付出十倍精神學好做一件事，令到自己可以好有效率咁做好佢，好過我學唔好，之後每次剪片都花好多時間做，蠶食晒我做其他野既時間。

作文，講野，以致學語文，都係同樣道理：我地喺需要用語言之前提前學好語言，將未來需要用既語句記憶至滾瓜爛熟，為既就是喺用語言既時候能夠順暢一啲，令自己唔會因為諗極都諗唔到既frustration而放棄，唔表達自己。

台上一分鐘，台下十年功，要做好一件事，很多嘢都要提前學好，平日勤練工。

你要學好，痛苦既係今日既你，如果你學唔好，痛苦既就係未來既自己。

所以，明明剪片咁辛苦，但點解我仍然要學？點解我仍然要剪？

因為我鍾意英文，我想做好「自媒體」既工作，有一啲信息，我好像effectively咁傳遞出去，但呢個世界唔係人人都好似我咁，咁鍾意文字，有啲人鍾意透過影像學習，有啲人鍾意透過聲音學習。我透過影片教學同分享，就係要speak other people’s language，用人地既語言同人地分享我鍾意既野，希望喺呢個過程之中，令呢個世界變得美好少少。

如果我唔學好剪片，咁有邊個會幫我剪？我可以依靠咩人去幫我實現我自己既夢？

諗到呢度，就乖乖地學好剪片，所有付出同所有犧牲，都係必要之惡。