要做人OK，俾人話得係好緊要㗎
有啲人好得意，一行出黎就發出一種唔俾人話得嘅氣場，咩係唔俾人話得嘅氣場呢？
當你同佢講佢有啲嘢做得唔好、某句說話講得唔好嘅時候，佢就會否認，話其實係你誤會咗我呀，我唔係咁嘅意思。換句話講，係你嘅問題，而唔係我嘅問題。佢哋唔會反省下，係咪自己表達方式有問題呢？
啲唔話得嘅人仲有個特質㗎，就係佢哋某啲嘢好執着，覺得自己唔可以錯，亦都唔勇於試新野，因為試新野就會犯錯，佢哋好想盡力避免俾人話嘅機會。
佢哋嘅人生就係活喺盡量避免犯錯之中。
最慘係見到有啲人身在高位，因為其他人都見到佢嘅表面，覺得佢好成功，例如賺好多錢、住靚樓、揸靚車、工作職位有返咁上下高，一人之下萬人之上，試問作為你嘅下屬，又點會批評你呢？如果家人伴侶對你嘅工作所知唔多，亦都冇能力去critique你，處境就更加危險，因為好多時就算你犯咗錯，都冇人會話俾你知，你只會一直咁錯落去。
唔知係好彩定唔好彩，呢個世界上有樣嘢叫mentorship，一個人係可以俾錢比其他人去講一啲唔好聽嘅但係啱嘅說話，例如呀，着衫唔靚，可以搵個形象設計幫手執靚佢，賺錢唔叻，可以搵個理財顧問教自己，好多嘢唔叻，都可以請一個教練去教自己。
我生活裏面見到最多人，係邊個範疇唔叻，而又冇人教佢呢？我見到最多嘅，就係溝通技巧有問題嘅人。自己用字有問題，同人哋互動技巧有問題，選用嘅溝通工具有問題，自己冇禮貌而不自知，但係冇人會同佢哋講佢哋犯咗錯，因為冇人想教仔㗎、都冇人想惹起爭拗，所以大家都係多一事不如少一事。
其實相信仲有好多case都係咁嘅，例如有啲人品味好差，分唔到咩叫好咩叫差，襯衫核突、睇戲又冇品味，不過自己都唔知。呢啲，有時我喺度諗，係咪請一個人生教練就可以解決呢？呢個計依個人生教練又可以喺邊度搵呢？不過，一個唔話得嘅人，係唔會想俾錢請一個教練嘅。所以，除咗佢哋永生永世咁錯落去，好似都冇第二條路。
其實我都好慶幸自己，身邊都算有啲人可以去批評下我、踩低下我，有時我都會主動問朋友，其實我有咩做得唔好啊？我俾人嘅感覺會唔會好強勢？會唔會有啲負面嘅觀感呢？雖然過程未必好pleasant，但係成日都要逼住自己聽一啲令自己唔舒服嘅說話，令到自己會改善嘅說話，因為每個人都係有盲點嘅，如果其他人願意批評你，你就會進步得快好多喇。